«Կաթնամթերք» ապրանքային շուկայում գնաճի պարզաբանումը
«Կաթնամթերքի» շրջանառության ոլորտում մարտ-մայիս ժամանակահատվածում տեղի ունեցած գնաճի հիմնավորվածությունը պարզելու նպատակով Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի (այսուհետ՝ Հանձնաժողով) կողմից իրականացվել է ուսումնասիրություն, որի շրջանակում վերլուծության է ենթարկվել «Կաթնամթերք» ապրանքային շուկայում գերիշխող դիրք ունեցող ընկերությունների առանձին ապրանքատեսակների ինքնարժեքներն ու շահութաբերության փոփոխությունները:
Վերլուծության արդյունքում պարզվել է, որ գնաճին նպաստել են շուկայի տնտեսական պայմանների հետևյալ հիմնական փոփոխությունները.
♦ մթերվող անարատ կաթի գնի բարձրացում,
♦ արտադրության մեջ օգտագործվող կարագի միջազգային գների աճ,
♦ կաթնամթերքի առանձին ապրանքատեսակների ցածր շահութաբերություն:
Տեղական արտադրության կաթնամթերքի գնաճին նախորդել է ՀՀ-ում կաթնամթերքի գների աճ, ինչը վկայում է նշված ոլորտի գնաճի վրա տնտեսական պայմանների օբյեկտիվ ազդեցության մասին:
Ուսումնասիրության ընթացքում համեմատության մեջ է դրվել ՀՀ-ում արտադրված և Երևան քաղաքի խոշոր առևտրային օբյեկտներում («Երևան Սիթի») իրացվող, ինչպես նաև ԱՀ-ում և ՀՀ-ում արտադրված և Ստեփանակերտ քաղաքում իրացվող կաթնամթերքի մանրածախ միջին գները:
♦ Տեղի ունեցած գնաճի արդյունքում ԱՀ-ում արտադրված կաթնամթերքը շարունակվում է իրացվել ավելի էժան, քան ՀՀ-ում:
♦Իրականացրած ուսումնասիրության արդյունքում մրցակցային օրենսդրության խախտման դեպքեր չեն արձանագրվել:
- Բաժին ՆՈՐՈՒԹՅՈՒՆՆԵՐ